DODOMA – Rais wa Tanzania, Samia Suluhu Hassan, ametunukiwa Shahada ya Uzamivu ya Heshima kutoka Nasarawa State University, Keffi nchini Nigeria, kupitia hafla iliyofanyika kwa njia ya mtandao Aprili 11, 2026.
Hafla hiyo imefanyika Ikulu ya Dodoma, ambapo Rais Samia alipokea heshima hiyo inayotambua mchango wake katika uongozi, maendeleo na masuala ya kijamii barani Afrika.
Kwa mujibu wa chuo hicho, Rais Samia ametunukiwa shahada hiyo kwa kutambua nafasi yake kama kinara wa nishati safi ya kupikia, juhudi zake katika kuboresha afya ya mama na mtoto, pamoja na mchango wake katika kuimarisha taswira ya uongozi wa wanawake barani Afrika.
Aidha, chuo hicho kimetambua juhudi zake katika kusimamia na kuendeleza masuala ya biashara, hususan kwa vijana, kama sehemu ya mkakati wa kukuza uchumi jumuishi na fursa za ajira.
Tuzo hiyo inaongeza orodha ya heshima za kimataifa zinazotolewa kwa Samia Suluhu Hassan, huku ikiakisi mchango wa Tanzania katika ajenda za maendeleo endelevu, usawa wa kijinsia na uongozi barani Afrika.
Wachambuzi wanasema kutambuliwa huko kunaimarisha hadhi ya Tanzania kimataifa, hasa katika maeneo ya nishati safi, afya ya jamii na uwezeshaji wa wanawake na vijana.
